Kerweihspruch 2018

E Kerweihspruch vun Hans Stemper sen. aus Marktl am Inn, der sehr gut in unsre heidiche Zeit passt

Liewe Landsleit, liewe Gäscht!

Ich mecht eich alli begrieße uf unsrem Fescht.
Wie des jo fascht e jeder schun wess,
feire mir heit die Kerweih so wie in Andres.
Die Banater Kerweih war e großes Fescht.
E jeder hat sich gfreid, wenn er haat vill Gäscht.
Musik!

Alli ware dann luschdich un froh,
des war schun bei unsre Ahne damols ach so.
Sie hann vill gearweit un sich gere unnerhall
un sin nohem Tanz gleih zum Viech in de Stall.
Sie hann mit vill Mieh un recht vill Fleiß
e Kornkammer ufgebaut zwischen Donau und Theiß.
Musik!

Uf emol is kumm der verdammti Kriech,
sie hann verlor no die Heimat un ihr Viech.
Die meischte vun do sin noch im Banat getaaft
un sin dann vun de Securitatea gen verkaaft.
Musik!

Mir feire awer noch gere unser Ahne ihre Sitte
mit dem Kerweihstrauß in unsrer Mitte.
Schaut mol wie scheen is doch die Kerweih Tracht
mer gspiert‘s in de Bruscht wie es Herz ehm do lacht.
Musik!

Der Vorstrauß is e duftende, ufgeputzte Roßmarein
de hann schun unser Ahne mitghol vum Rhein.
Mit dem Strauß un seine farwiche Benner
war schun frieher es Kerweihfest noch vill schenner.
Musik!

Un das ich des ach jetzt net vergess
an de Kerweih hatt mer immer gut gess.
Meischtens Gänsebradl un gebrotne Worscht,
dann haate ach alli immer vill Dorscht.
Noh hann die Männer gebrung de Wein,
der hat alli gut gschmeckt un war ach rein.
Musik!

In de Näh vun de Kerch hat gstan uf de Gass
vun Samschtachs bis Mittwuchs de Kerweihbahm un es Fass.
Uf´m Fass hat gsaht de Vortänzer e Begrießungsspruch
un de Kerweihvater hat verlizidiert de Hut un es Tuch.
Musik!

Die Gewinner hat mer mit Musik dann hem gspillt,
die Kerweihbuwe un Mädle hann beim Polka getrillt.
Dort hatt mer sie mit Kipfle, Kuche und Kaffee bedient,
des wu sie dorch die Strapatz sich ehrlich hann verdient.
Musik!

So war des in Andres damols gewehn.
Ach heit soll es scheen do in Deitschland zugehn.
Alli solle sich do gut unerhalle,
no tut´s de Organisatore un uns alli gut gfalle.
Musik!

Musik! …un die Andreser Musikante han sich net zwoo Mol heesche geloss